Bageshwar Baba नागपुरात बागेश्वर बाबांचे छत्रपती शिवाजी महाराजांबाबत वादग्रस्त वक्तव्य

NewsZenn Apr 25, 2026 67 0

नागपूर : बागेश्वर धामचे पीठासीन धीरेंद्र कृष्ण शास्त्री उर्फ बागेश्वर बाबा यांनी छत्रपती शिवाजी महाराज यांच्याबाबत केलेल्या वक्तव्यामुळे नवा वाद निर्माण झाला आहे. नागपुरात आयोजित भारतदुर्गा शक्तिस्थळाच्या शिलान्यास सोहळ्यात त्यांनी केलेल्या विधानावरून विविध स्तरांतून प्रतिक्रिया उमटत आहेत. या कार्यक्रमाला देवेंद्र फडणवीस, मोहन भागवत, नितीन गडकरी यांच्यासह अनेक मान्यवर उपस्थित होते. यावेळी बोलताना धीरेंद्र शास्त्री यांनी शिवाजी महाराज आणि समर्थ रामदास स्वामी यांच्याबाबत एक कथित प्रसंग सांगितला.

त्यांच्या मते, सतत युद्ध लढून थकलेल्या शिवाजी महाराजांनी समर्थ रामदास स्वामींकडे जाऊन आपला मुकूट त्यांच्या चरणी ठेवत राजपाट सांभाळण्याची विनंती केली. तसेच आपण थकलो असून विश्रांतीची गरज असल्याचे त्यांनी व्यक्त केल्याचा दावा बागेश्वर बाबांनी केला. पुढे त्यांनी सांगितले की, रामदास स्वामींनी हा मुकूट पुन्हा शिवाजी महाराजांच्या डोक्यावर ठेवत “राज्य माझे, पण संचालन तुम्हीच करणार” अशी भूमिका मांडली.

या विधानानंतर ऐतिहासिक सत्यतेवर प्रश्नचिन्ह उपस्थित करण्यात येत असून, सामाजिक आणि राजकीय वर्तुळात यावरून तीव्र प्रतिक्रिया उमटण्याची शक्यता व्यक्त केली जात आहे. शिवाजी महाराजांच्या इतिहासाशी संबंधित संवेदनशील मुद्द्यावर केलेल्या या वक्तव्यामुळे वाद अधिकच चिघळण्याची चिन्हे दिसत आहेत.