आजीच्या खणाची 'ट्रेंडी' साडी

NewsZenn Nov 4, 2020 3077 0

जुनं ते सोनं म्हणतात अगदी तसंच आज्जीबाईंच्या चोळीच्या खणाचं झालं आहे. लग्न असो व पार्टी सगळीकडे भाव खाऊन जाणारा खण. प्रत्येक स्त्रीच्या कपाटात एक तरी खणाची साडी व ड्रेस असायलाच हवा.

पारंपारिक दागिने व हटके साड्या हा स्त्रियांचा अतिशय जिव्हाळ्याचा विषयच नव्हे, तर जीवनातील अविभाज्य घटक आहे. डिझायनर खाणांच्या साड्यांचा ट्रेंड आता महिलांना खुणावत आहे. महाराष्ट्रातच नव्हे तर भारतभर लोकप्रिय असलेल्या पारंपरिक पैठणी इतकीच सध्या खणाची साडीदेखील स्त्रियांना हवीहवीशी वाटत आहे. सध्या बाजारात खणाच्या हॅन्डलूम , पावररलूम बरोबरच पॉलिस्टर खणाच्या साड्यांना मागणी वाढली आहे. नेमक्‍या या साड्या महिलांना का मोहनी घालत आहेत. ते पाहुया.

1) कित्येक वर्षांपासून 36 इंच पन्ह्याच्या खणांचे तागे केवळ कापड बाजारात मिळत असे. अशा ताग्यातील कापडापासून साड्या बनविणे थोडे कष्टदायक होते. मात्र, आता मोठ्या पन्ह्याचे तागे व सव्वासहा मीटरच्या साड्याही मार्केटमध्ये सहज मिळू लागल्या आहेत. त्यामुळे कापड वाया जाण्याची भिती नाही. महिला व्यावसायिकांचेही काम सोपे झाले. सध्या खणाच्या साडीची लोकप्रियता वाढल्याने उत्पादकांनी 45 इंच उंचीच्या तयार साड्यांचे उत्पादन घेण्यास सुरुवात केली आहे.

2)खणांच्या साड्यांमध्ये पॅचवर्क, प्लीक वर्क, भरतकाम, मशिन एम्ब्रॉयडरी, खणाची हाफ-हाफ साडी अशा विविध डिझायनर साड्यांची कलाकुसर होऊ लागली आहे. कालातंराने जाळी, लोकर, विविध रंगाचे कापडी आकर्षक गोंडे केल्याने पदराचे सौंदर्य अधिकच खुलून दिसत आहे.

3)खणाच्या साड्यांवर पैठणी बुट्ट्याची एम्ब्रॉयडरी हा सध्या नवीन ट्रेंड आहे. पैठणीवर असणारे मोर, पोपट, कमळाच्या डिझाईनचा वापर खणांच्या साड्यांवर केल्याने सौंदर्याला पैठणीच्या पारंपारिकतेची जोड मिळाली आहे.

4) खणांच्या साड्यांवर साडीच्या काठाचा कॉन्ट्रास्ट ब्लाऊज घातल्यास अधिक खुलून दिसतं. हातावरच्या पदरावर एखादाच छोटा पैठणी मोटिफ्सचा बुट्टी एम्ब्रायडरी केल्यास छान दिसतो. जास्त बटबटीत मोटिफ्सने साडीचे सौंदर्य कमी होते. यावर ब्रोकेड ब्लाऊजपण ट्राय करायला हरकत नाही.

5)या साड्यांवर पारंपारिक दागिने प्रकारातील गोल्डन, टेम्पल ज्वेलरी शोभून दिसेल. चांदीचे व ऑक्‍सिडाईड दागिने पण छान दिसतात. मात्र, इमिटेशन, मोत्यांची मॉडर्न ज्वेलरी उठून दिसत नाही. शक्‍यतो ती टाळावी.

6)लग्न, मुंज व साखरपुडा कार्यक्रमातही महिला या खणाच्या साड्या घालू शकतात. 'समथिंग डिफरंट' म्हणून तरुण मुली देखील आता आवडीने या साड्या घालू लागल्या आहेत. तरुणांमध्ये खणाच्या कुर्त्यांची देखील फॅशन वाढली आहे. तरुणही हे कुर्ते आवडीने परिधान करत आहेत. गृहिणींच्या बरोबरच सिनेसृष्टीतील अभिनेत्रींना सुद्धा भुरळ पाडणारी खणाची साडी परदेशातही लोकप्रिय झाली आहे.

7) साडी घेताना पोत नक्कीच पहायला हवा, कारण काही पॉलिस्टर साड्यांचे धागे उसवण्याची भिती असते. ते असे ओळखावेत. हॅन्डलूम खणाला चकाकी नसते तर पॉलिस्टर खण हे भडक व चकाकीदार असतात. साडी नेहमी ड्रायक्‍लीन करावी. कारण रंग उडण्याचं टेंन्शन नाही.

8) कलकत्ता व इतर टोकदार ज्वेलरी खणाच्या साड्यांवर घालणे शक्‍यतो टाळावे. अन्यथा साड्यांचे धागे निघण्याची शक्‍यता असते.

-सुनीता कुलकर्णी, सुनीता सारीज , डिझायनर