खंडोबारायाच्या चरणी नतमस्तक होऊन बैलगाडा शर्यतीचा भंडारा उधळला

NewsZenn Dec 28, 2021 840 0

बैलगाडा शर्यतीस परवानगी मिळाल्यानंतर मावळचे आमदार सुनील शेळके यांनी महाराष्ट्रातील पहिली बैलगाडा शर्यत आयोजित करण्यापूर्वी रविवारी (दि.२६) श्री क्षेत्र निमगाव दावडी येथील खंडोबाचे बैलगाडा मालक, प्रेमी व बैलगाडा संघटनांच्या पदाधिकाऱ्यांसह दर्शन घेऊन बैलगाडा शर्यतीचा भंडारा उधळला.

यावेळी अण्णासाहेब भेगडे, माजी सभापती निवृत्ती शेटे,रामनाथ वारिंगे, रामकृष्ण टाकळकर, माऊली पिंगळे, संतोष गव्हाणे, दिलीप डूबे, माजी नगरसेवक संदीप शेळके,नवनाथ पडवळ, उमेश बोडके, मनोज येवले, नितीन मुऱ्हे, देविदास गायकवाड, रोहित काळोखे तसेच अखिल भारतीय बैलगाडा संघटनाचे पदाधिकारी, बैलगाडा मालक, बैलगाडाप्रेमी आदी उपस्थित होते.

महाराष्ट्रातील बैलगाडा प्रेमींच्या आणि शेतकऱ्यांच्या जिव्हाळ्याचा विषय असलेल्या बैलगाडा शर्यती वरील बंदी उठवून सर्वोच्च न्यायालयाने बैलगाडा शर्यतीस सशर्त परवानगी दिली आहे.सर्वोच्च न्यायालयाच्या निकालानंतर सर्व आवश्यक प्रक्रिया पूर्ण करून जिल्हाधिकारी यांच्या परवानगीनुसार महाराष्ट्र राज्यातील पहिली बैलगाडा शर्यत आमदार सुनिल शेळके यांनी 1 जानेवारी 2022 रोजी मावळ तालुक्यातील नाणोली येथे आयोजित केली आहे. आणि या बैलगाडा शर्यतीच्या अगोदर मावळ व खेड तालुक्यातील लोकांचे श्रद्धास्थान असलेल्या खेड मधील निमगाव येथील खंडोबारायाचा आशीर्वाद घेऊन आमदार शेळके यांनी बैलगाडा शर्यतीचा भंडारा उधळला. बैलगाडा शर्यतींवरील बंदी उठविण्यासाठी प्रयत्नांची पराकाष्ठा करणाऱ्या पदाधिकाऱ्यांचा यावेळी विशेष सन्मान करण्यात आला.

मावळात अनेक वर्षानंतर बैलगाडा शर्यती होणार असल्याने मावळ मधील शेतकऱ्यांमध्ये उत्साहाचे वातावरण निर्माण झाले असून बंदी असतानाही गेले अनेक वर्षे जीव लाऊन जपलेल्या बैलांना ते आता घाटात उतरविण्याच्या तयारीला लागले आहेत.

“बैलगाडा शर्यत राज्यातील शेतकऱ्यांचा जिव्हाळ्याचा विषय आहे.आता भिर्रर्र होणार… परंतु सर्व बैलगाडामालक, बैलगाडाप्रेमींनी शासनाने दिलेले नियम पाळावेत.आपली बैलगाडा शर्यत कायम सुरु रहावी,यासाठी काळजी घ्यावी,” असे आवाहन आमदार सुनील शेळके यांनी केले.

Click Here To See More