भोसरी ते नेपाळ दरम्यान सायकल मोहिमेस प्रारंभ

NewsZenn Feb 15, 2023 612 0

स्वातंत्र्याच्या अमृतमहोत्सवानिमित्ताने मराठा वारिअर्सद्वारे भारत ते नेपाळ हा २०२३ किलोमीटरचा प्रवास सायकलने पूर्ण करण्याच्या मोहिमेची सुरवात भोसरीतील छत्रपती शिवाजी महाराज यांच्या पुतळ्यास अभिवादन आणि पुष्पहार अर्पण करून करण्यात आली. या प्रवासात वारिअर्सद्वारे मैत्रीचा, सामाजिक एकतेच्या संदेशाबरोबरच भारताने ७५ वर्षात केलेल्या प्रगतीचा आलेख सर्वदूर पोचविणार आहेत.

खडकी अम्युनिशन फॅक्टरीचे जनरल मॅनेजर संजय हजारे, कीर्तनकार पुरुषोत्तम महाराज पाटील, पुणे महापालिकेचे उपायुक्त ज्ञानेश्वर मोळक, सुधाकर शेळके, पिंपरी- चिंचवड महापालिकेचे माजी महापौर नितीन काळजे, सामाजिक कार्यकर्ते प्रदीप तापकीर आदींसह भोसरीकरांनी प्रवासासाठी वारिअर्सना शुभेच्छा दिल्या.

या मोहिमेत संदीप जगताप, बजरंग मोळक, विश्वास काशीद, प्रशांत जाधव, संतोष दरेकर, नारायण मालपोटे, नीलेश धावडे हे वारिअर्स सहभागी झाले असून, या मोहिमेचे नेतृत्व संदीप जगताप करत आहेत. ही मोहीम महाराष्ट्र (पुणे), मध्यप्रदेश (इंदोर), उत्तर प्रदेश (अयोध्या) आदी तीन राज्यातून नेपाळला जाणार आहे. भोसरीत रविवारी (ता. १२) सुरू झालेली ही मोहीम २२ दिवसांनी नेपाळमध्ये पोचणार आहे.

मराठा वारिअर्सने यापूर्वी २०१७ मध्ये लेह-लडाख बुलेट राईड, २०१९ मध्ये पुणे ते वाघा बॉर्डर सायकल प्रवास, २०२१ मध्ये पुणे ते पानिपत सायकल प्रवास आणि २०२२ मध्ये पुणे ते हम्पी बुलेट राईड अशा साहसी मोहिमा यशस्वीरीत्या पूर्ण केल्या आहेत.

Click Here To See More