पंतप्रधानांच्या उपस्थितीत होणाऱ्या कार्यक्रमाला पवार, ठाकरे येणार का ?

NewsZenn Mar 3, 2022 707 0

देशाचे पंतप्रधान नरेंद्र मोदी येत्या रविवारी पुणे दौऱ्यावर आहेत. त्यांच्या या दौर्‍यात वेगवेगळे कार्यक्रम पार पडणार आहे. दरम्यान या कार्यक्रमासाठी मुख्यमंत्री उद्धव ठाकरे आणि राष्ट्रवादी काँग्रेसचे अध्यक्ष शरद पवार यांनाही निमंत्रण महापालिकेकडून देण्यात आले आहे. परंतु ते या कार्यक्रमाला उपस्थित राहणार आहेत का याबाबत अद्याप काहीही कळविण्यात आलेले नाही अशी माहिती अधिकृत सूत्रांकडून देण्यात आली आहे.

पंतप्रधान नरेंद्र मोदी ६ मार्च रोजी सकाळी साडेदहा वाजण्याच्या सुमारास लोहगाव विमानतळावर दाखल होतील. त्यानंतर तेथून ते पुणे महानगरपालिकेत पोहोचतील. महापालिकेत साकारण्यात येणाऱ्या छत्रपती शिवाजी महाराजांच्या स्मारकाचे लोकार्पण त्यांच्या हस्ते होणार आहे. दहा मिनिटांच्या या कार्यक्रमानंतर ते गरवारे महाविद्यालय येथील मेट्रो स्टेशनची पाहणी करतील. गरवारे महाविद्यालय येथील मेट्रो स्टेशन वरून ते आनंद नगर मेट्रो स्टेशन येथे जाणार आहेत. मेट्रोचा उद्घाटन सोहळा पार पडल्यानंतर ते कोथरूड येथील एमआयटी महाविद्यालयाच्या मैदानावर जाहीर सभेला उपस्थिती लावतील. एमआयटीच्या मैदानावर त्यांची जाहीर सभा होणार आहे.

दरम्यान पुण्यात संपन्न होणाऱ्या या कार्यक्रमासाठी राज्यपाल भगतसिंग कोश्यारी, मुख्यमंत्री उद्धव ठाकरे, उपमुख्यमंत्री अजित पवार, नगर विकास मंत्री एकनाथ शिंदे, विरोधी पक्ष नेते देवेंद्र फडणवीस, राष्ट्रवादी काँग्रेसचे अध्यक्ष शरद पवार, विधानपरिषदेचा उपसभापती नीलम गोरे, खासदार उदयनराजे भोसले यांच्यासह शहरातील सर्व खासदार आमदार यांना या कार्यक्रमासाठी निमंत्रित करण्यात आले आहे.

Click Here To See More