टाटा मोटर्सच्या समभागांसाठी आजचा दिवस मौल्यवान

NewsZenn Oct 14, 2021 721 0

एअर इंडियाचे अधिग्रहण, टीसीएसचा वाढलेला तिमाही नफा आणि टाटा मोटर्समध्ये ७,५०० कोटींची झालेली गुंतवणूक या सकारात्मक घडामोडींमुळे टाटा समूहातील विविध कंपन्या गेल्या काही दिवसांपासून चर्चेत आहेत. बुधवारच्या भांडवली बाजारातील व्यवहारात समूहातील सर्व कंपन्यांच्या समभागांना मूल्यवर्धनाचा सूर गवसलेला दिसून आला.

बुधवारी टाटा मोटर्सच्या समभाग २०.४५ टक्कय़ांच्या वाढीसह ५०६.९० रुपयांवर स्थिरावला. दिवसात त्याने ५२३.८५ उच्चांकी पातळी गाठली. गेले वर्षभर टाटा मोटर्सचा समभाग १७०-१९० रुपयांच्या पातळीवर रेंगाळत होता.

चालू ऑक्टोबर महिन्यात टाटा समूहातील टाटा टेलिसव्‍‌र्हिसेसचा (महाराष्ट्र) समभाग ४३ टक्के, टाटा पॉवरचा समभाग ४१ टक्के, टाटा मोटर्स डीव्हीआर २५ टक्के आणि टाटा इन्व्हेस्टमेंट कॉर्पोरेशनचा समभाग २४ टक्कय़ांची वाढ झाली. याचबरोबर टाटा केमिकल, टाटा स्टीलच्या समभागात देखील चांगली वाढ झाली. याच काळात टाटा मोटर्सच्या बाजारभांडवलात ५५,००० कोटी, टायटनच्या बाजार भांडवलात ३७,००० कोटी, टाटा पॉवरच्या बाजार भांडवलात २०,००० कोटी, टाटा स्टीलच्या बाजार भांडवलात १०,००० कोटी तर टाटा केमिकलच्या बाजार भांडवलात ५,५०० कोटींची भर पडली.

टाटा समूहाचे बाजार भांडवल २३.५ लाख कोटी रुपयांवर पोहोचले. ऑक्टोबर महिन्यात कंपनीच्या बाजार भांडवलात सुमारे १.१८ लाख कोटींची भर पडली. सप्टेंबर अखेर टाटा समूहाचे बाजार भांडवल सुमारे २२.३५ लाख कोटी होते.

Click Here To See More