कर सवलत टप्प्याटप्प्याने कमी होणार

NewsZenn May 11, 2022 660 0

महापालिका प्रशासक राजेश पाटील यांनी मालमत्ताकर आगाऊ भरणाऱ्या करदात्यांना, महिला मालमत्ताधारकांना ‘झटका’ दिला आहे. सामान्य करात देण्यात येणारी करसवलत पुढील आर्थिक वर्षापासून टप्प्याटप्प्याने कमी करण्याचा निर्णय प्रशासकाने घेतला आहे. तर, ऑनलाईन कर भरणा करणाऱ्यांना यापुढील काळात दहा टक्क्यांऐवजी केवळ पाच टक्केच करसवलत दिली जाणार आहे. या निर्णयाचा फटका सुमारे दीड लाख मालमत्ताधारकांना बसणार आहे.

महापालिका करसंकलन विभागामार्फत इमारती आणि जमिनींवर करआकारणी केली जाते. मालमत्ताधारकांनी वेळेत कर भरावा यासाठी प्रोत्साहनपर विविध करसवलती देण्यात येतात. महिलांच्या नावे असलेल्या मालमत्तांना चालू आर्थिक वर्षातील सामान्य करात ५० टक्के सवलत दिली जाते. तर, मालमत्ताकराचा आगाऊ भरणा करणाऱ्यांना सामान्य करात १० टक्के सवलत दिली जाते. प्रशासक राजेश पाटील यांनी या कर सवलती कमी करण्याचा निर्णय घेतला आहे. महिलांच्या नावे असलेल्या मालमत्तांना सन २०२३-२४ मध्ये ३० टक्के तर सन २०२४-२५ मध्ये सामान्य करात २० टक्के सवलत तसेच, मालमत्ताकराचा आगाऊ भरणा करणाऱ्यांना सन २३-२४ पासून सामान्य करात ५ टक्के सवलत देण्याचा निर्णय राजेश पाटील यांनी घेतला आहे.

नुकत्याच संपलेल्या सन २०२१-२२ च्या आर्थिक वर्षात ३७ हजार ५०८ मालमत्ताधारकांनी आगाऊ कर भरून एक कोटी ५५ लाखांची सवलत मिळविली होती. आगामी वर्षात त्यांना कर भरताना खिशाला झळ सोसावी लागणार आहे. मालमत्ताकर ऑनलाइन भरल्यास १० टक्क्यांपर्यंत सूट दिली जाते. सन २०२१-२२ या आर्थिक वर्षात त्याचा लाभ एक लाख ५३ हजार २०६ मालमत्ताधारकांनी घेतला. यापुढील काळात ऑनलाईन कर भरणा करणाऱ्यांना दहा टक्क्यांऐवजी केवळ पाच टक्केच करसवलत दिली जाणार आहे.

Click Here To See More