मनसेला जय महाराष्ट्र करणाऱ्या रुपाली ठोंबरेंचं सूचक ट्वीट

NewsZenn Dec 16, 2021 714 0

पुण्यातील मनसेच्या महिला नेत्या रुपाली पाटील ठोंबरे यांनी दोन दिवसांपूर्वी राजीनामा देत सर्वांनाच धक्का दिला. रुपाली ठोंबरे यांनी पक्षाच्या प्राथमिक सदस्यत्वाचा राजीनामा देत असल्याचं जाहीर केलं होतं. राज ठाकरे यांना याबाबत लिहिलेल्या पत्रात त्यांनी दिलेल्या बळ आणि प्रेरणेसाठी आभार मानत राज ठाकरे हे नाव कायम ह्रदयात कोरलेलं राहिल, असं त्या म्हणाल्या होत्या. दरम्यान, राजीनाम्यानंतर रुपाली पाटील ठोंबरे या कोणत्या पक्षात जाणार याकडे सर्वांचं लक्ष लागलं होतं. खुद्द रुपाली पाटील यांनीच सूचक ट्वीट करत याबद्दल उत्तर दिलंय.

“आज शरद पवार साहेबांना आशीर्वाद देऊ शकतील असे ‛हात’ नाहीत व पवार साहेब झुकून नमस्कार करतील असे ‛पाय’ दिसत नाहीत ; हो म्हणूनच ठरलंय! या वटवृक्षाच्या सावलीत महाविकास आघाडीत स्थिरावणार…”, असं ट्वीट रुपाली पाटील ठोंबरे यांनी केलंय. यावरून त्या राष्ट्रवादी काँग्रेसमध्ये जाणार असल्याचं स्पष्ट झालंय.

रुपाली पाटील यांनी राजीनाम्यात काय म्हटलं?
रुपाली पाटील यांनी आपल्या राजीनाम्यात म्हटलं, “सप्रेम जय महाराष्ट्र, मी माझ्या महाराष्ट्र नवनिर्माण सेना पक्षातील सर्व पदासह पक्षाचा प्राथमिक सदस्य पदाचा राजीनामा देत आहे. आपण दिलेलं बळ नेहमी संघर्ष करण्याची प्रेरणा देत. यापुढेही आपले आशीर्वाद आणि मा.”श्री.राज ठाकरे” हे नाव ह्रदयात कोरलेले कायम राहिल. जय महाराष्ट्र.”

दरम्यान, रुपाली ठोंबरे यांच्या राजीनाम्यानंतर मनसे नेते संदीप देशपांडे यांनी ट्वीट करत यावर प्रतिक्रिया दिली होती. “सूर्य तळपतील चंद्र झळकतील। तारे अपुला क्रम आचरतील।। असेच वारे पुढे वाहतील। जन पळभर म्हणतील, ‘हाय हाय!’,” असं ट्वीट संदीप देशपांडे यांनी केलं होतं.

Click Here To See More