चीनमध्ये आढळला मंकीपॉक्सचा पहिला रुग्ण, “परदेशी नागरिकांना स्पर्श करू नका

NewsZenn Sep 19, 2022 573 0

चीनमध्ये पहिला मंकीपॉक्सचा रुग्ण सापडल्यानंतर प्रशासनाकडून कठोर निर्बंध लागू करण्यात आले आहेत. चीनमधील परदेशी नागरिकांना स्पर्श करू नका, असा आदेश चीनच्या रोग नियंत्रण आणि प्रतिबंध केंद्राचे प्रमुख वू झुन्योऊ यांनी दिले आहेत. ‘विईबो’ या संकेतस्थळावरील त्यांच्या पोस्टनंतर नवा वाद निर्माण झाला आहे. या आदेशाची तुलना करोना साथीच्या सुरवातीच्या काळात आशियाई देशांनी सामना केलेल्या भेदभावाशी करण्यात येत आहे.

चीनमध्ये मंकीपॉक्सचा प्रभाव रोखण्यासाठी झुन्योऊ यांनी नागरिकांना खबरदारीचा सल्ला दिला आहे. आंतरराष्ट्रीय प्रवास आणि एकमेकांच्या संपर्कातून मंकीपॉक्स पसरण्याची जोखीम असल्याचे झुन्योऊ यांनी म्हटले आहे. करोना साथीच्या काळात परदेशी नागरिकांनी भीतीपोटी ज्याप्रकारे चिनी नागरिकांचा संपर्क टाळला होता, हा तसाच प्रकार असल्याची पोस्ट ‘विईबो’ या संकेतस्थळाने केली आहे.

चीनच्या चोन्गक्युन्ग या शहरात पहिला मंकीपॉक्सचा रुग्ण आढळला आहे. हा रुग्ण परदेशातून आल्याची माहिती प्रशासनाने दिली आहे. हा व्यक्ती चिनी नागरिक आहे की परदेशी याबाबत प्रशासनाने अद्याप खुलासा केला नाही. या व्यक्तीला महापालिकेने विलीगीकरणात ठेवले आहे. या व्यक्तीच्या संपर्कात आलेल्या लोकांवरही महापालिकेच्या आरोग्य विभागाची नजर आहे. मे महिन्यापासून जगभरात मंकीपॉक्सच्या प्रसाराला सुरुवात झाली आहे. जगभरातील ९० देशांमध्ये मंकीपॉक्सचे रुग्ण आढळून आल्यानंतर जागतिक आरोग्य संघटनेने आरोग्य आणीबाणी घोषित केली आहे. जगभरात सध्या मंकीपॉक्सचे ६० हजार सक्रीय रुग्ण आहेत.

Click Here To See More