Hema Malini Birthday Special : बॉलिवूडमध्ये एक वेगळी ओळख निर्माण केली

NewsZenn Oct 16, 2021 874 0

सौंदर्य आणि अभिनयाच्या जोरावर अभिनेत्री हेमा मालिनी यांनी बॉलिवूडमध्ये एक वेगळी ओळख निर्माण केली. त्यांच्या सौंदर्याची भुरळ चाहत्यांसोबत अनेक अभिनेत्यांना होती. बॉलीवूडची ड्रीम गर्ल अशी हेमा मालिनी यांची ओळख आहे.

त्या गेल्या वीस वर्षांहून अधिक काळ समाजकारण, राजकारण, सांस्कृतिक क्षेत्रामध्ये कार्यरत आहे. त्यांनी आपल्या अभिनयानं मोठ्या प्रमाणात लोकप्रियता मिळवली आहे. ४ दशकांहून अधिक काळ बॉलीवूडमध्ये असणाऱ्या हेमा मालिनी यांचा आज वाढदिवस आहे. हेमा मालिनी यांनी वयाची ७३ वर्षे पूर्ण केली आहेत. १६ ऑक्टोबर १९४८ रोजी चेन्नईच्या अम्मनकुडी येथे जन्मलेल्या हेमा यांनी १९६३ मध्ये तामिळ फिल्म 'इधु साथियम'द्वारे आपल्या अभिनय करिअरचा श्रीगणेशा केला होता.

हेमा यांनी वयाच्या १४ व्या वर्षी इंधु साथियम या चित्रपटात छोटीशी भूमिका साकारली होती. या चित्रपटाशी निगडीत एक गोष्ट आजही हेमा विसरु शकल्या नाहीत. फिल्ममेकरने एकदा मंचावर हेमा यांचा डान्स बघितला होता. तो डान्स बघून ते इम्प्रेस झाले होते आणि त्यांनी हेमा यांना त्यांच्या चित्रपटासाठी साइन केले. चित्रपटात हेमा यांची भूमिका स्टेजवर मैत्रिणींसोबत डान्स करण्याची होती. चित्रपट रिलीज झाल्यानंतर हेमा त्यांच्या आजोबांसोबत (आईचे वडील) चित्रपट बघायला गेल्या. पण चित्रपटातील हेमा यांचा संपूर्ण रोलच कट करण्यात आल्याचे बघून त्या हैराण झाल्या. त्यानंतर त्या हमसून हमसून रडल्या होत्या.